LUNGSOD NG PUERTO PRINCESA — Inaprubahan sa regular na sesyon ng Sangguniang Panlungsod ng Puerto Princesa ang resolusyong mariing sumusuporta sa pagsasabatas ng Senate Bill No. 1765 na magbabawal sa political dynasties.
Ayon kay City Councilor Peter Maristela na siyang pangunahing may akda ng resolusyon, layunin nito na maipahayag ang suporta sa pagpapasa ng batas laban sa political dynasty na isinusulong ngayon sa Senado.
“Itong resolusyong ipinasa natin ay pagpapakita na ayaw talaga natin ng political dynasty, second degree of consanguinity or affinity, sabay-sabay na pagtakbo sa pulitika ng mag-asawa, mag-ama, mag-ina, mag lolo o magkapatid, maganda ito, magiging limited na ang sakop ng political dynasty at para sa atin ay realistic na ito,” ani Maristela.
Binigyang diin sa resolusyon ang probisyon ng 1987 Constitution kung saan nakasaad ang pagbibigay ng garantiya sa pantay na oportunidad sa serbisyo publiko at pagbabawal sa political dynasty.
“Nasa constitution na ito eh. Iyong pagtiyak na mabigyan ng equal access sa pulitika ang mga Filipino, di pa nai-de-define ng constitution kung ano ang political dynasty kaya kinakailangan ng batas, pero consolidated na ito kaya magandang nasuportahan natin,” dagdag pa ng konsehal.
Bagama’t ang paghahain ng resolusyon ay pamamaraang pagpapahayag ng sentimiyento, aminado si Maristela na may mga pulitiko sa lungsod at lalawigan na natatamaan ng panukalang batas dahil sa sitwasyon.
“Dito sa atin may mga ganyang sitwasyon. May mga pulitiko na matataas ang posisyon papatakbuhin ang asawa, anak at sabay silang tatakbo. Meron niyan dito sa atin kaya palagay ko mahalagang sinuportahan natin ito na siya rin namang sentimiyento ng mga mamamayan natin,” aniya pa.
Aminado naman si Konsehal Modesto Rodriguez ll na hindi siya sang-ayon sa isinusulong na panukalang batas, bagama’t aniya, hindi niya tinutulan ang inihaing resolusyon sa konseho sapagkat iyon ay isang pamamaraan ng pagpapahayag ng sentimiyento.
“Hindi naman ako nag object dahil sentiment ‘yon ng kasamahan nating konsehal pero nag-request ako na alisin ang pangalan ko as one of the authors,” tinuran ni Rodriguez.
Paliwanag ni Rodriguez, sa kaniyang pananaw ay walang malalabag na probisyon ng batas kung ang mag-asawa, mag-ama na pareho o sabay na iniluklok ng taong bayan sa posisyon sa gobyerno sa pamamagitan ng pagboto at hindi itinalaga lamang o ini-appoint.
“Bagamat totoo na ‘yan ay nasa ating Saligang Batas pero kung mapapansin niyo, dito kasi sa iprenesenta nila, di natin alam ang intensiyon ng mga nagpasa ng batas, kasi sinasabi dito, ‘di pwedeng kumandidato ng sabay ang mag asawa o ang anak at magulang eh para sa akin, that is an elected position, hindi naman ito appointed position at ang taong bayan ang nagdesisyon dyan,” pahayag ni Rodriguez sa panayam ng Palawan Daily News.
“Tandaan din natin ang probisyon sa batas na Right of Suffrage, ibig sabihin may karapatan tayong bumoto at iboto, magiging taliwas ito doon sa panukalang batas,” dagdag pa ng opisyal.
Isa pa sa tatlong hindi sumang-ayon sa resolusyon si Konsehal Victor Oliveros. Katulad ng naging katayuan ni Rodriguez, naniniwala siyang walang dynasty kung ang pagpili aniya ng isang namumuno ay sa pamamaraan ng isang demokratikong proseso at malinis na pamamaraan na mamamayan ang pumipili na mamuno sa pamahalaan.
Aniya, kapag ang batas ay hindi nagbigay ng pantay na oportunidad sa isang indibiduwal, ay tila binalewala na rin nito ang karapatan ng lahat.
“When justice denied to a certain person, justice denied to everybody. Pag pinagbawalan mo ang isang tao na sumunod sa yapak ng magulang, wala nang opportunity don..maliban nalang kung apat na nagsabay sabay na sa pulitika,” ani Oliveros.
“Bakit di na lang natin tingnan ‘yong nawawalan na ang opportunity dahil sa sobrang yayamang tao na wala nang pagkakataon ang mga maliliit? Pag sinabi kasing equal opportunity, dapat lahat ng indibidual nabibigyan ng karapatan. Kasi equal opportunity ang dahilan natin eh, walang monopolya sa demokratikong proseso,” pahayag pa ng konsehal. (EM/PDN)
Discussion about this post