Nagrereklamo na ang mga magtitinda ng karne at isda sa Old Public Market ng Puerto Princesa City dahil humina na umano ang kanilang benta dahil sa kawalan ng parking area para sa mga mamimili.
Ayon kay Shirley Baltar, dati-rati ay umaabot sa mahigit P100,000 ang kanilang kinikita sa loob ng isang araw na pagtitinda ng karne, ngayon ay nasa P60,000 na lamang ito.
“Dati bumebenta kami ng P35,000-50,000 sa hapon lang pero ngayon ay 10,000 na lang,” pagdidiin pa niya.
Sinabi pa ni Baltar na kung noon ay napakarami ng mga namimili tuwing hapon hanggang gabi, ngayon ay napakakunti na lang dahil mas pinipili na umano ng mga mamimili ang mga mall na may parking area.
“Ang problema kasi kapag nag-park ang mamimili, hinuhuli sila at titikitan ng P3,000 kaya doon na lang sili bibili sa mga mall kasi mayroon silang parking lot,” dagdag pa niya.
Samantala, kinumpirma naman ni Vince Padin na nasa 30% ang ibinaba ng kanilang kita sa pagtitinda ng isda.
“Halimbawa P12,000 ang benta namin sa hapon hanggang gabi, ngayon ay nasa P8,000 na lang,” sabi pa niya.
Kaugnay nito ay sinabi naman sa Palawan Daily News ni Teresita Gabayan, Pangulo ng Samahan ng mga magtitinda sa Old Public Market, na problema talaga ngayon ang parking area pero nag-iisip na raw ng paraan ang kanilang opisina.
“Isang malaking-malaking problema talaga ngayon ang parking,” ani ni Gabayan.
Magkagayunman sinabi niya na sa kaniyang palagay ay nagkakaroon lang ng problema ay kung papaanong pasunurin ang mga nagpa-park sa parking area sa bahagi ng Burgos Street.
Mayroon daw naman kasing parking area subalit tumatagal ang pagparada dito ng mga nagtitinda kaya hindi na rin na bibigyan ng pagkakataon na maka-park ng kanilang sasakyan ang mga mamimili.
Pero maliban sa bahagi ng Burgos Street, malaya noon ang mga mamimili na magparada ng sasakyan sa iba pang kalye sa palibot ng palengke.
Matatandaang ipinag utos ng Department of the Interior and Local Government o DILG sa mga lokal na pamahalaan batay sa naging pahayag ni Pangulong Rodrigo Duterte noong kaniyang huling State of the Nation address (SONA) na alisin ang mga nakaharang sa mga kalsada at sidewalk kabilang na ang mga nakaparadang sasakyan sa daan.
Dahil dito ay nanawagan ngayon ang mga nagtitinda sa pamahalaan na maglagay ng parking area para bumalik muli sa palengke ang mga mamimili at bumalik na rin ang sigla ng kanilang benta.