Mula sa unang araw ng kanyang panunungkulan bilang hepe ng Philippine National Police (PNP), malinaw ang mensahe ni Gen. Nicolas Torre III: walang sinuman—maging kilalang personalidad o abogado—ang exempted sa batas.
Sa isang press briefing nitong Lunes, hinamon ni Torre si dating presidential spokesperson Harry Roque na umuwi sa Pilipinas at harapin ang kasong human trafficking na isinampa laban sa kanya kaugnay ng operasyon ng Lucky South 99, isang offshore gaming company sa Porac, Pampanga.
Kasunod ng pagkakalabas ng arrest warrant ng Angeles City Regional Trial Court Branch 118 noong Mayo, agad umanong nagpakilos si Torre, noon ay direktor pa ng Criminal Investigation and Detection Group (CIDG), upang tugisin si Roque at ang 50 iba pang akusado. Dalawa na ang naaresto ng CIDG sa magkahiwalay na operasyon sa Pampanga nitong Mayo 22 at 29.
Kinumpirma rin ni Torre na nakipag-ugnayan na siya sa International Criminal Police Organization (Interpol) upang humiling ng red notice laban kay Roque, na ngayo’y naghahanap ng asylum sa Netherlands.
Ayon sa mga dokumentong isinumite sa korte, ang kaso ay paglabag sa Republic Act 9208 o Anti-Trafficking in Persons Act. Bahagi umano ng mas malawak na imbestigasyon ang papel ni Roque sa operasyon ng naturang kompanya, na sinasabing sangkot sa iligal na pag-eempleyo ng mga banyaga.
Wala pang opisyal na pahayag si Roque hinggil sa mga paratang. Ngunit ang kanyang pagsumite ng asylum application sa The Netherlands ay nagpapahiwatig, ayon sa ilang tagamasid, ng intensyon nitong umiwas sa jurisdiksyon ng mga korte sa Pilipinas.
Habang nagpapatuloy ang kaso, idiniin ni Torre na isusulong niya ang pananagutan sa ilalim ng batas, anuman ang estado o impluwensya ng sangkot.
