Dalawa ang arestado habang isa naman ang nakatakas sa magkahiwalay na drug buy bust operations ngayong araw dito sa Lungsod ng Puerto Princesa.
Base sa spot report mula sa PNP, 1:20 ng hapon unang nahuli sa Barangay Sta. Monica si Arwin Cadaydayon Perigrino, 42 anyos, foreman, may asawa, at residente sa Bgy. Mandaragat. Nakumpiska sa kaniya ang tatlong plastic shachets na pinaghihinalaang shabu, isang cellphone, motor na ginamit ng suspek, at Php 3,500.00 na buy bust money.
Sa isinagawa namang follow-up operation noong 4:50 ng hapon sa Barangay Masipag ay nahuli rin sa buy bust operation si Michael Murillo, 40 anyos, binata, at residente rin sa Barangay Masipag habang ang kasama nito na si Niño Ebidag ay nakatakas.
Nakumpiska naman kila Murillo ang dalawang plastic sachets na pinaghihinalaang shabu at Php 1,000.00 na buy bust money.
Samantala, ang mga suspek ay nasa pangangalaga na ng PNP at kakaharapin ang kasong paglabag sa Republic Act 9165 o “Comprehensive Dangerous Drug Act”.