Arestado ng San Vicente Municipal Police Station (MPS) ang limang indibidwal, kabilang na ang dalawang pastor, sa Quarantine Control Point sa Bayan ng San Vicente dahil sa paglabag sa Wildlife Act.
Kinilala ang mga suspek na sina Dominador Quilpio Belitario Jr., 42 anyos, isang pastor, residente ng Brgy. Bancao-Bancao; Stephen Alfonso Nobles Rabang, 67 taong gulang, isang pastor, residente ng Brgy. San Manuel; Panny Liniman Tayam, 41 taong gulang, computer technician, residente ng Brgy. Milagrosa; Antonio Abutay Cahandoc, 44 anyos, drayber, residente ng Brgy. Tagburos; at Elmer de Vera Gabico, 44 anyos, salesman, at residente ng Brgy. San Manuel, mga pawang may asawa at mula sa Lungsod ng Puerto Princesa.
Sa spot report mula sa Palawan Police Provincial Office (PPO), nakasaad na dakong 9:20 pm kahapon, Setyembre 23, 2020, habang nagsasagawa ng checkpoint ang personnel ng San Vicente MPS kasama ang mga tauhan ng Municipal Public Safety and Emergency Program ng Bayan ng San Vicente sa Quarantine Control Point (QCP) sa Sitio Landing, Brgy. New Agutaya ay naharang nila ang humigi’t kumulang 35 kilo ng endangered Species na “Abalone” na nakalagay sa dalawang mga ice box na dala ng nasabing mga suspek na sakay ng Mitsubishi Strada GLS 3.2 pickup na may plate number na takda umanong iluwas palabas ng munisipyo ng walang kaukulang wildlife special used permit.
Dagdag pa rito, lumapit din umano ang isa sa mga sakay na si Stephen Alfonso N. Rabang at nagpakilalang siya ay isa ring police officer sa pamamagitan ng pagpresenta ng police badge at police identification card sa arresting officer na malinaw na paglabag sa Article 177 ng Revised Penal Code (Usurpation of authorities or official function).
Bunsod nito ay agad na inaresto at dinala ang mga subject persons sa San Vicente MPS kabilang na ang mga nakumpiskang mga ebidensiya para sa paghahain ng kasong paglabag sa Section 27 p (f) ng Republic Act 9147 o ang “Wildlife Resources Conservation and Protection Act” may kaugnayan sa Fisheries Administrative Order No. 208 at paglabag sa Article 177 ng Revised Penal Code (Usurpation of Authorities or Official function) naman laban kay Rabang.
Nakasaad sa Section 27 p (f) ng Wildlife Act na maliban na lamang kung pinahihintulutan ng batas ay mariing ipinagbabawal ang pangungulekta, pagha-hunting o pagkakaroon ng mga buhay-ilang at kanilang mga by-products at derivatives. Sa Artikulo 177 ng RPC (Usurpation of official functions) naman, nakasulat na ang sinumang magpapakilalang hawak ang isang official position, kaugnay sa isang person in authority o public officer ng walang legal na basehan upang gawin iyon ay kakaharapin din ang kaukulang kaso.
Sa hiwalay namang panayam, kinumpirma ni San Vicente MPS Chief of Police, PLt. Erickson Dimalaluan na hindi pulis ang isa sa mga subject person na si Rabang.
“Hindi siya police, mayroon [lang] siyang ID, [at] badge—fa-file-lan ko rin siya ng separate case [dahil doon]. Pagdating sa checkpoint, [noong] itse-check na namin, lumapit siya ro’n sa isa [sa mga pulis at sinabing] tropa rin daw siya. Ipinakita niya ang badge niya na basta kamukhang-kamukha ng sa amin pero vinirefy [namin], hindi naman talaga ID namin, ‘yong badge lang kamukha. Bawal talaga ‘yon!” pahayag pa ni PLt. Dimalaluan.
Ayon pa sa hepe ng San Vicente MPS, nakaupo si Rabang sa front seat ng sasakyan na posible umanong ang dahilan ay siya ang kumakausap sa mga bantay ng checkpoint at ipinakikita ang mga iyon. “Yon, pupwede ‘yon sa mga barangay checkpoints, maniniwala, ‘pag pulis, [hindi] siyempre, alam naman namin ‘yon.”
Napag-alaman umano ng pulsiya na mula sa Brgy. Panindigan, San Vicente, Palawan ang nabanggit na mga patay ng abalone ngunit walang permit na ibinibigay ang local na pamahalaan para sa nasabing mga buhay-ilang.
“Vinalidate ko kasi rito sa munisipyo, kung nag-iisyu sila [ng permit para rito], sabi nila, hindi raw talaga; wala raw silang permit na niri-release sa ganyan…. Nang hinanapan namin, wala rin talaga [silang maipakitang mga permit],” dagdag pa ni PLt. Dimalaluan.
Samantala, habang isinusulat naman ang balitang ito ay patungo na sa Lungsod ng Puerto Princesa ang mga tauhan ng San Vicente PNP kasama ang mga naarestong suspek para sa pagsasampa sa kanila ng kasong paglabag sa Wildlife Act kaugnay sa Fisheries Administrative Order No. 208 sa Provincial Prosecution Office of Palawan at inihahanda na rin ang hiwalay na kasong paglabag sa Article 177 ng RPC laban pa kay Rabang.
Sa update namang ibinigay ng Chief of Police ng San Vicente MPS ay nakapagpiyansa na ang nasabing mga indibidwal ngayong hapon sa halagang P3,000 kada isa para sa paglabag sa Wildlife Act habang naisampa na rin ang kasong Usurpation of Authority at nakapagpiyansa rin si Rabang ng halagang P30,000.