NARRA, PALAWAN– Patay ang isang lalaki matapos na aksidenteng mabaril ng kasama nito sa Barangay Taretiin, kahapon, Agosto 28.
Kinilala ang biktima na si Roger Linteha, 43 anyos, may asawa habang kinilala naman ang suspek na si Romero Gose, 51 anyos, parehong magsasaka at residente din ng barangay kung saan nangyari ang krimen.
Base sa report ng Narra Municipal Police Station, nagtungo sa kagubatan ang biktima at ang suspek kasama ang dalawang iba pa upang manghuli ng baboy damo nang aksidenteng mabaril ni Gose ang biktima sa kaliwang bahagi ng dibdib gamit ang 12-gauge shot gun.
Agad naman isinugod sa Narra Medical Hospital ang biktima ngunit idineklara rin itong dead on arrival matapos na bumaon ang bala sa dibdib nito.
Nasa kustodiya na ngayon ng Narra Police ang nakabaril matapos na boluntaryong sumuko sa mga otoridad at isinuko na rin ang baril na ginamit nito.
Discussion about this post