63-anyos, patay sa aksidente sa bayan ng Roxas

Sangkot sa aksidente ang isang Honda TMX 155 na traysikel na minamaneho ng isang alyas “Lando,” habang hindi na pinangalanan ng pulisya ang pasahero nito na parehong residente ng Barangay 3, sa bayan ng Roxas.

Kinilala naman ang drayber ng Isuzu van sa alyas na “Ar Ar,” 48-anyos, at residente ng Barangay Mangingisda sa lungsod ng Puerto Princesa, at ang helper nito na hindi na rin pinangalanan ng pulisya.

Base sa inisyal na imbestigasyon ng Roxas Municipal Police Station (MPS), habang binabaybay ng mga biktima ang kahabaan ng norte ng Barangay New Barbacan patungong sur ng Poblacion sa Roxas ay sinubukan umanong kumaliwa ng traysikel dahilan upang masalpok ito ng kasalubong niyang Isuzu van.

Dahil sa pagkakasalpok, nagtamo ng iba’t ibang sugat sa katawan ang drayber at pasahero nito na parehong isinugod sa Roxas Medicare Hospital ng mga rumespondeng tauhan ng Municipal Disaster Risk Reduction and Management Office (MDRRMO). Sa kasamaang palad ay hindi na umabot pa ng buhay ang pasahero at idineklarang dead on arrival ng sumuring doktor.

Hindi naman nagtamo ng sugat sa katawan ang drayber at helper ng van.

Samantala, nasa kustodiya na ng Roxas MPS ang drayber ng van para sa tamang disposisyon.