Isang insidente ng pananaksak ang naitala kaninang 2:30 am sa Brgy. Villa Libertad, El Nido, Palawan.
Kinilala ang biktima na si Reggie de Asis, 30 taong gulang, binata, delivery boy, at residente ng Brgy. Villa Libertad, El Nido, Palawan habang ang suspek ay si Enerio Villarosa Gutierrez, 40 anyos, may asawa, tricycle driver, at residente rin ng nasabing lugar.
Sa spot report mula sa PPO, nakasaad na kaninang 4:10 am ay tumawag ang kapitan ng Brgy. Villa Libertad sa El Nido MPS upang iulat ang insidente ng pananaksak.
Napag-alaman ng mga otoridad na nag-iinuman ang biktima at ang suspek na nang makatulog ang una ay sinaksak siya ng huli.
Bunsod nito ay nagtamo ang biktima ng mga saksak sa iba’t ibang bahagi ng kanyang katawan at agad na isinugod sa 4k Clinic upang maipagamot habang ang suspek ay inaresto ng rumesponding pulis at ngayon ay nasa kustodiya ng El Nido MPS para sa tamang disposisyon.