Trending ngayon sa Facebook ang dalawang lalaki matapos silang ireklamo ng isang netizen na nangangalang Smith John Kevin dahil umano sa “modus” ng dalawa na pag-imbita sa iba’t-ibang babae upang gawing model sa mga pekeng car/motor shows.
Tinukoy ni Smith ang mga pangalan ng dalawang lalaki bilang si Jayson Viray at Mil Pham sa kanyang Facebook post. Ang dalawa ay parehong residente ngayon ng Narra, Palawan.
Ayon sa post ng netizen, muntik nang mabiktima ng dalawang lalaki ang nobya ng kanyang kaibigan matapos umano nilang imbitahan ang naturang babae upang magmodel sa isang car show na gaganapin sa Narra nitong Setyembre 29.
Ang pangalan ng magnobyo ay parehong itinago ni Smith.
Hayag ni Smith sa kanyang post, na-engganyo ang nobya ng kaibigan matapos alukin ni Viray at ni Pham ng P3,000 talent fee kung papayag siyang magmodel sa gaganapin na car/motor show.
Nagbiyahe ang mag-boyfriend sa Narra kahapon ng umaga, Setyembre 29.
Ngunit, inabot umano sila ng 7;00 PM sa kahihintay ng gaganapin na car show ngunit sa kanilang pagtataka ay walang naganap na car show sa naturang bayan.
Dagdag ni Smith sa kanyang post, puro alibi lang ang dinadahilan ng dalawa tungkol sa car show. Kapwa din umano silang kinabahan dahil nagpabili na ng isang case ng alak sina Viray at Pham.
Sa isang eksklusibong interview ng Palawan Daily News kay Jayson Viray nitong hapon, Setyembre 30, hayagang dineny ng inirereklamo na “modus” umano ang pag-iimbita nila sa mga babae upang gawing car/motor show models.
“Hindi yan totoo. Iba kasi ang nangyari,” anya Viray.
“Noong ininvite siya, hindi alam ni Mik na may boyfriend pala itong babae. Noong pagpunta niya, hindi siya napili kasi tiningnan din naman kung anong standard, kung matangkad ba o hindi. So hindi siya nakuha, tapos itong boyfriend niya hindi niya pala pinaalam na nagpunta siya rito,” dagdag ni Viray.
Nag-away umano ang dalawa na siya namang pinagsimulan ng gulo. Hayag ni Viray, ang nobyo din umano ng babae ang pinanghihinalaan nilang nag-post ng insidente sa Facebook kagabi.
“Away nilang dalawa ‘yun. Siya ang kusang pumunta dito. Kung siya matinong babae sasama pa ba siya sa iba diba?” giit ni Viray.
Hindi rin daw umano totoo na sinabi nilang may car show noong Setyembre 29, bagkus ang kanila daw ipinaalam sa babae ay gaganapin ang car show sa October 23 kasabay ng selebrasyon ng Palay Festival sa bayan ng Narra.
“Sa 23 pa, sa Palay Fest pa ang motor show. ‘Yung boyfriend niya nalang nag-imbento nung 29. Away nilang dalawa ‘yun. Labas kami kasi ang nangyari pa diyan, sumunod dito ‘yung boyfriend niya kahapon. Tinatawagan siya ng boyfriend niya noong umaga, hindi niya sinasagot. Pero nagkita din kami lahat,” anya Viray.
Ayon pa dito, kanila pang inimbitahan ang mag-nobyo sa kanilang tahanan upang maki-celebrate sa birthday ng isa nilang kamag-anak.
“Sumama ang loob noong boyfriend niya kasi hinanap siya, ayaw niya kasi sabihin na andun siya pero natunton din niya ‘yung bahay. Kung may ginawa kaming masama sakanya bakit pa namin patutuluyin sa bahay namin ‘yung boyfriend niya at yayayain maki-birthday?” anya Viray.
Inihayag ni Viray na sila ay handang ireport sa awtoridad ang nasabing post upang malinaw ang kanilang mga pangalan.