Hindi nabahala ang mga opisyal ng bayan ng Kalayaan sa naging hakbang ng Chinese Embassy sa Pilipinas na i-ban sila sa pagpasok sa China, kabilang ang Hong Kong at Macao. Ang kanilang ikinalungkot ay ang pagiging hati ng opinyon ng ilang Pilipino sa usapin sa West Philippine Sea (WPS).
Sa isang press conference nitong Miyerkules, Pebrero 11, sa opisina ng Kalayaan Extension Office sa Barangay San Jose, sinabi ni Sangguniang Bayan (SB) Member Francis Polizon na may ilang Pilipino pa rin ang hindi sang-ayon o hati ang pananaw sa mga hakbang ng pamahalaan upang protektahan ang teritoryo ng bansa sa WPS.
“Sabe nga sa survey 83 percent ng mga Pilipino ang naniniwala o sang-ayon sa ginagawa ng gobyerno [ng Pilipinas] towards sa West Philippine Sea. Masaya ‘no? ang laki, 83 percent out of 100. Pero malungkot pa rin ako sa side na ‘yun, alam mo kung bakit? Kasi may 17 percent. Gusto ko tanungin asaan ang 17 percent? Bakit 83? Bakit may 17 na hindi sila sang-ayon sa ginagawa ng gobyerno. That’s a question eh,” saad ni Polizon.
Ang tinutukoy niya ay ang ginawang survey ng OCTA Research na kinumisyon ng Armed Forces of the Philippines noong nakaraang taon. Batay kasi sa survey na tumagal noong Setyembre 25-30, mahigit 83 percent umano ng Pinoy ang sumusuporta sa pahayag na ang West Philippine Sea ay mahalagang bahagi ng karapatang pandagat ng Pilipinas, at buong pusong sinusuportahan ng sumagot sa survey ang pagsisikap ng bansa na pangalagaan at igiit ang mga karapatang soberanya sa teritoryong ito.
Ayon pa sa resulta, dalawang porsyento ang hindi sumagot, habang 14 porsyento naman ang nagsabing wala pa silang tiyak na desisyon. Tinanggap naman ng pamunuan ng AFP ang resulta ng naturang survey.
Dagdag pa ni Polizon, patuloy silang maninindigan at gagawin ang lahat ng kanilang makakaya upang ipakita ang suporta sa pamahalaan at igiit ang karapatan ng Pilipinas sa West Philippine Sea.
“Again, kahit magmukha po tayong…paulit-ulit nating sabihin na atin ang West Philippine Sea na malinaw naman sa dagat — malinaw naman sa dagat na atin ang West Philippine Sea na atin talaga yon, gagawin at gagawin natin yon. Hindi tayo titigil hanggang sa huling hininga ko, namin sa amin po.”