Diskwento sa Cellphone at libreng sine para sa seniors, isinulong sa kamara

Sa ilalim ng House Bill No. 1404, layon ni Chua na amyendahan ang Republic Act No. 7432 o ang Senior Citizens Act upang mas mapaigting ang suporta sa mga matatandang Pilipino, lalo na sa panahon ng mabilis na teknolohikal na pagbabago at tumataas na halaga ng pamumuhay.

Mga Pangunahing Laman ng Panukala:

• 20% diskwento sa pagbili ng cellphone – limitado sa isang beses bawat tindahan, ngunit makatutulong ito sa mga senior upang makapanatiling konektado sa pamilya at impormasyon.

• Libreng panonood ng sine tuwing Lunes at Huwebes – mula sa kasalukuyang 20% diskwento, ganap na libre na ang tiket sa piling araw sa lahat ng sinehan sa bansa.

• P5,000 ayuda sa naulilang kamag-anak – isang beses na tulong-pinansyal para sa pamilya ng yumaong senior citizen.

• Buwanang stipend na ₱1,000 at PhilHealth coverage para sa lahat ng indigent senior citizens – palalawakin ang kasalukuyang saklaw upang matiyak na walang senior citizen ang maiiwan.

Ang panukala ni Chua ay kasabay ng lumalawak na panawagan para sa mas inklusibong patakaran para sa mga nakatatanda, na madalas na naaapektuhan ng kakulangan sa access sa teknolohiya, serbisyong pangkalusugan, at libangan.

Sa datos ng Philippine Statistics Authority, tinatayang mahigit 12 milyong Pilipino ang senior citizens ngayong taon, karamihan ay hindi sapat ang kita o pensyon upang tugunan ang kanilang araw-araw na pangangailangan.

Bagama’t may ilang lokal na pamahalaan na nagbibigay ng libreng sine at iba pang pribilehiyo sa mga matatanda, iginiit ni Chua na dapat gawing pambansang polisiya ang mga ito sa pamamagitan ng batas upang lahat ng senior citizens ay makinabang, anuman ang kanilang tinitirhang lalawigan.

“This bill offers measures of inclusivity to ensure that our senior citizens not only adapt but thrive,”dagdag pa ni Chua.

Nakaantabay na ngayon ang pagtalakay sa panukala sa Kamara, habang umaasa si Chua na agad itong makalusot para maipatupad sa lalong madaling panahon.