Arestado sa ikinasang drug buy-bust operation ng Bataraza Municipal Police Station ang high value individual na si Jeffrey Sanuddin, 37-anyos, mangingisda, at residente ng Sitio Marabahay, Barangay Rio Tuba, bayan ng Bataraza, Palawan.
Ayon sa report ng Palawan Provincial Police Office, ganap na 8:00 PM noong Marso 9, nang maaresto ang suspek sa operasyon sa lugar nito.
Nabilhan ng isang pakete ng ilegal na droga ang suspek ng asset ng PNP kapalit ang limang daang piso.
Habang kinakapkapan ang suspek, nakuhaan pa ito ng anim na pakete ng pinaniniwalaang droga at iba pang mga paraphernalia na nakalagay sa sling bag.
Tinatayang nasa P28,000 ang halaga ng shabu.
Nasa kostudiya na ng Bataraza Municipal Police Station ang suspek at humaharap sa kasong paglabag ng Republic Act 9165 o Comprehensive Dangerous Drug Act of 2002.