Muling tinalakay sa Sangguniang Panlungsod kahapon, Pebrero 2, ang pagkakaroon ng karagdagang fire trucks ng Bureau of Fire Protection–Puerto Princesa (BFP-PPC), kasunod ng mga naitalang insidente ng sunog kamakailan, kabilang ang nangyareng sunog sa Pamilihang Bayan sa Bonoan Road, Barangay Tagumpay.
Ayon kay Konsehal Elgin Damasco, kinakailangang dagdagan ang bilang ng mga fire truck na rumeresponde sa lungsod matapos makumpirma na iisa lamang ang BFP-owned fire truck na ginagamit sa Puerto Princesa na isang Highly Urbanized City (HUC).
Bagama’t kinumpirma ni Senior Fire Officer 2 Leonard Bryan Gacayan na iisa lamang ang fire truck na pagmamay-ari ng BFP, nilinaw niya naman na may iba pa silang hinahawakang mga unit sa lungsod na naka-deploy sa kanilang anim (6) na substations.
“Yung isa po ‘yun is BFP-owned pero may mina-man po kami na fire truck from local katulad sa CDR [CDRRMO] katulad sa substation. ‘Yung first responder po natin baka hindi nila napansin bombero po ‘yung nagma-man po nun ‘yung sa substation po natin,” saad ni SFO2 Gacayan.
“Iisa lang po ang BFP-owned pero meron po kaming mina-man from local,” dagdag pa niya.
Binanggit din ni Damasco na may nauna nang naisumiteng resolusyon sa konseho na humihiling sa pamahalaang nasyunal na dagdagan ang fire trucks ng BFP, kasunod ng malawakang sunog noong taong 2024 sa Barangay Bagong Silang at Barangay Pagkakaisa kung saan tinatayang mahigit 200 kabahayan ang natupok ng apoy.
“Kung maalala po ninyo ‘yung sunog sa Quito nag-pass na po tayo ng resolution dito sa Sangguniang Panlungsod asking the DILG Secretary [Jonvic Remulla] na dagdagan naman ‘yung kanilang fire truck. Kasi kung hindi pa bumili ang city government ng mga fire truck after nang nangyare sa Quito, Mr. Presiding Officer, hindi lang ganiyan ang mangyayare sa ating palengke baka mas malawak pa,” saad ni Damasco.
Ayon pa sa konsehal, nararapat lamang sa isang lungsod na tinaguriang HUC ang pagkakaroon ng sapat na bilang ng fire trucks upang agad na makaresponde sa malalaking insidente ng sunog. Kaya naman muli itong nanawagan sa nasyunal at sa pamunuan ng BFP na tugunan ang kakulangan ng fire trucks sa Puerto Princesa.
Nang tanungin naman kung ilang fire trucks ang kinakailangan ng BFP-PPC, sinabi ni SFO2 Gacayan na lima o higit pang unit ang kailangan upang matiyak ang mabilis na responde, dahil sa lawak ng lungsod at dami ng populasyon nito.
Ayon naman kay Damasco, batay sa pamantayang itinakda noon ng Department of the Interior and Local Government (DILG), dapat ay may isang fire truck sa bawat 28,000 populasyon. Dahil tinatayang nasa humigit-kumulang 300,000 ang populasyon ng Puerto Princesa, nararapat umano itong magkaroon ng hindi bababa sa sampung fire trucks.
HIWALAY NA NUMERO PARA SA SUNOG
Naging isyu kamakailan lang ang umano’y pahirapan na pagtawag sa numero ng BFP noong magkaroon ng sunog sa Barangay Bagong Sikat noong Enero 27 kung saan inireklamo ng ilang mga biktima ng nasunogan na umano’y nahirapan silang tawagan ang dalawang numero ng BFP upang agad na ma-report ang nangyayareng sunog.
Nilinaw ni SFO2 Gacayan na ang mga numerong tinatawagan noon ng ilang residente ay “inactive” na at hindi na opisyal na ginagamit ng BFP. Ipinaliwanag niya rin na nagpalit na sila ng hotline noong nakaraang taon at ipinaalam ito sa publiko sa pamamagitan ng kanilang opisyal na Facebook page, gayundin sa mga seminar at inspeksiyong isinasagawa ng kanilang istasyon.
Dagdag pa niya, maaari ring tumawag ang publiko sa National Emergency Hotline na 911, na direktang nakikipag-ugnayan sa kanila. Nakapaskil din umano ang bagong hotline number ng BFP sa mga tanggapan tulad ng City Disaster Risk Reduction and Management Office (CDRRMO).
Samantala, hiniling naman ni Konsehal Herbert “Bong” Dilig sa BFP-PPC na magkaroon ng isang hiwalay at eksklusibong numero para lamang sa mga insidente ng sunog.
