Nananatiling naka-lockdown ang isa sa pitong zone sa Barangay Cabigsing, Cuyo, Palawan ayon sa ulat ni Cuyo Mayor Mark Delos Reyes kaninang umaga sa programang Palawan Daily Newsroom, Nobyembre 4, 2020.
“Zone 6 na lang po ang naka-ECQ. ‘Yong ibang zone ay nasa MGCQ na po. Pitong zone po ‘yan [at] isa na lang po ang naka-ECQ,” ani Delos Reyes.
Matatandaang mataas ang bilang ng kaso ng Covid19 sa bayan ng Cuyo at local transmissions sa Barangay Cabigsing kung kaya’t isinailalim ito sa lockdown.
Samantala, bagama’t may dalawa pang aktibong kaso ng COVID-19 sa munisipyo ay wala umanong dapat ikabahala ang mga residente ng Main Cuyo.
“Nasa private island po ang dalawa na naiwan [na positibo sa COVID-19]. Sa ngayon po, okay na po kami dito. Gumaganda na ang sitwasyon pero hindi po kami nagpapabaya, ‘yung mga health protocols po ay dire-diretso naming pinapatupad dito sa bayan ng Cuyo,” saad pa ni Delos Reyes.
Discussion about this post