Lalaki, arestado dahil sa pagbebenta ng walang lisensiyang baril sa Brooke’s Point

Dinakip ng mga alagad ng batas ang isang  57 anyos na lalaki sa Bayan ng Brooke’s Point dahil sa pagbebenta ng baril na walang lisensiya.

Kinilala ang suspek na si Silvino Ramos dela Peña na naninirahan sa Sitio Tagusao, Brgy. Barong-barong sa nabanggit na munisipyo.

Sa spot report na ibinahagi ng Provincial Police Office Office, nakasaad na dakong 7:15 pm noong Hulyo 18, 2020 ay

isinagawa ang isang joint operation ng Brooke’s Point MPS bilang lead unit, PIU  at 2nd Provincial Mobile Force Company (PMFC) sa Sitio Tagusao, Brgy. Barongbarong, Brooke’s Point

dahil sa paglabag ng isang indibidwal sa RA 10591 o ang “Comprehensive Firearms and Ammunition Regulation Act.”

Una umanong nakatanggap ng impormasyon ang mga awtoridad buhat sa isang confidential informant na maghanap ng buyer ng kanyang baril si “Alias Beni.”

Kaya sa nabanggit na oras at lugar ng insidente ay naganap ang pakikipagtransaksyon  sa suspek at iniabot naman umano niya ang baril sa mga bibili upang kanilang matingnan. Pagkatapos nito ay hinanapan siya ng lisensiya sa baril ngunit bigo umano siyang makapagpresenta nito na naging dahilan ng kanyang  pagkakaaresto.

Nakuha naman sa kanyang  pag-iingat ang isang Norinco pistol cal. 45, dalawang magazine para sa cal .45, nasa 11  of live ammunitions at isang kulay itim na  inside holster.

Isinagawa naman umano ang  imbentaryo, pagmamarka at  ang pagkuha ng mga larawan sa mga nakumpiskang  bagay mismo sa lugar ng insidente at sinaksihan ng isang kawani ng media at ni Kapt. Eugenio Caabay ng Brgy. Barong-barong.

Sa ngayon ay nasa kustodiya na Brooke’s Point MPS ang suspek at ang mga nakumpiskang aytem buhat sa kanya.ele