Isang chinese research vessel, dumaan sa silangang bahagi ng palawan, sinabayan ng navy at coast guard

Ayon kay Rear Adm. Roy Vincent Trinidad, tagapagsalita ng Philippine Navy para sa West Philippine Sea, natukoy ng Littoral Monitoring Station (LMS) Melville ang presensya ng barkong Lan Hai 101 at agad itong hinamon.

“In response to the challenge issued by LMS Melville, the crew aboard the CRV Lan Hai 101 communicated that their rerouting through the eastern waters of Palawan was necessitated by adverse sea conditions on the western side,” ani Trinidad sa isang pahayag nitong Lunes.

Tiniyak ng tripulante ng barko mula sa Cgina na dumadaan lamang sila at susunod sa mga pandaigdigang alituntunin kaugnay ng innocent passage sa loob ng Philippine archipelagic sea lanes. Sinabi rin nilang lalabas sila sa bahagi ng Coron, Palawan.

Upang tiyakin ang seguridad sa rehiyon at ipakita ang soberanya ng Pilipinas, agad na nagpadala ang Western Command (WESCOM) ng BRP Andres Bonifacio ng Philippine Navy at BRP Melchora Aquino ng Philippine Coast Guard upang subaybayan ang pagdaan ng Chinese research vessel.

“The Armed Forces of the Philippines remains vigilant in its efforts to monitor maritime activities in the vicinity and reaffirms its commitment to maintaining the safety and security of the Philippine archipelago,” ani Trinidad.

“The deployment of naval and coast guard assets serves as a testament to the collaborative approach in addressing maritime challenges,” dagdag niya.

Ang panibagong insidenteng ito ay nangyari sa gitna ng patuloy na pagmo-monitor ng puwersa ng Pilipinas sa mga kilos ng mga dayuhang barko sa loob ng exclusive economic zone (EEZ) ng Pilipinas, lalo na matapos ang sunod-sunod na insidente ng presensya ng mga barkong Tsino sa mga pinag-aagawang teritoryo sa West Philippine Sea.

Samantala, pinuri ni Senadora Risa Hontiveros ang isinagawang Maritime Cooperative Activity (MCA) ng Pilipinas kasama ang Estados Unidos, Australia, at Japan upang mapanatili ang malaya, bukas, at ligtas na rehiyon sa Indo-Pacific.

Sinabi ni Hontiveros na ang naturang kooperasyon ay isang malinaw na hakbang laban sa pinalawak na territorial claims ng Beijing sa West Philippine Sea. Tinawag rin niya itong “baseless and in direct violation” ng United Nations Convention on the Law of the Sea (UNCLOS).