Sa gitna ng muling pag-alingawngaw ng mga espekulasyon ng kudeta sa Armed Forces of the Philippines (AFP), mariing itinanggi ni AFP Chief of Staff General Romeo Brawner Jr. nitong Miyerkules na mayroong planong patalsikin si Pangulong Ferdinand Marcos Jr. gamit ang puwersa militar.
“As long as I serve as Chief of Staff, no coup shall happen. Not on my watch. We will not be shaken by rumor, nor outmaneuvered by noise,” matatag na pahayag ni Brawner, habang patuloy na umiigting ang diskurso ukol sa umano’y kaguluhan sa loob ng hanay ng militar.
Sa gitna ng mga haka-haka at alegasyon na kumalat sa social media, lalo na matapos ang pagkakaaresto ni dating Pangulong Rodrigo Duterte at ang kanyang kasalukuyang paglilitis sa International Criminal Court (ICC) sa The Hague, Netherlands, naging sentro ng usapin ang papel ng AFP sa kasalukuyang klima ng pulitika.
Hindi ito ang unang pagkakataon na kinailangang magsalita si Brawner. Noong Enero, sa gitna ng paghahanda ng militar para sa eleksyon, tinanggihan na rin niya ang panawagan ni Duterte na ayusin umano ng AFP ang “fractured governance” sa ilalim ni Marcos Jr.
“Military junta won’t solve the country’s problems,” ani Brawner noon—isang paninindigan na muling pinagtibay ngayong muling lumalakas ang mga tsismis matapos ang midterm elections kung saan maraming kaalyado ni Duterte ang nanalo, habang kapuna-punang natalo ang ilang kandidato mula sa administrasyon.
Sa kanyang pinakabagong pahayag, iginiit ni Brawner ang integridad at propesyonalismo ng militar, sabay diin na ang AFP ay nananatiling tapat sa Konstitusyon at sa chain of command.
“Let me reassure our countrymen that the AFP remains strong, professional, and firmly loyal to the chain of command. We are a disciplined institution, grounded in respect for the Constitution, civilian authority, and the rule of law,” aniya.
Bagaman inamin niyang maaaring may iilang hinaing sa loob ng organisasyon, nilinaw ni Brawner na hindi ito sumasalamin sa buong sandatahang lakas.
“I have full confidence in the integrity, patriotism, and professionalism of the men and women of the military. Isolated grievances do not define the AFP—our collective commitment to service does,” dagdag pa niya.
Sa likod ng kanyang mensahe ay isang babala: ang pagkalat ng maling impormasyon ay hindi lamang nakasisira sa reputasyon ng AFP, kundi maaari ring magdulot ng mas malawak na panganib sa bansa.
“To those who persist in creating instability, I offer this not as a rebuke, but as a reminder. Do not sow doubt among the very ranks that safeguard our democracy. Do not attempt to influence or mislead soldiers who serve quietly, honorably, and with steadfast loyalty to our Constitution and our country,” aniya.
Bilang pagtatapos, hinikayat ni Brawner ang mamamayan na maging maingat at responsable sa paggamit ng kanilang boses at plataporma, lalong-lalo na pagdating sa mga isyung may kaugnayan sa pambansang seguridad.
“Let us not be adversaries in the same nation we all claim to love. Let us be better stewards of our words, platforms, and influence, because patriotism is not measured by how loudly we speak, but by how wisely we choose unity over division, and nation-building over disruption,” aniya.
Sa panahong ang bansa ay muling nililigid ng intriga at pangamba, si Brawner ay muling nagpapaalala: hindi lahat ng bulong ay totoo—at hindi lahat ng hinagpis ay dapat gawing dahilan para sirain ang mga institusyong dapat sana’y nagkakaisa para sa kapayapaan.
