isang 16-anyos na lalaki ang kasalukuyang ginagamot sa Ospital ng Palawan matapos siyang pagtulungan at pagsasaksakin sa gitna ng rambol ng dalawang grupo ng menor de edad sa Barangay Mandaragat bandang ala-una ng madaling araw nitong Sabado, Mayo 31.
Ayon sa paunang ulat mula sa mga awtoridad, nagsimula ang gulo sa umano’y hamunan sa sparring ng dalawang grupo ng kabataan na kapwa nasa impluwensiya ng alak.
Ngunit mabilis na lumala ang tensyon matapos umanong mabugbog ang isang miyembro, na naging mitsa ng pagganti at pagpasok ng mas malalaking kabataang sangkot sa insidente.
Nagtamo ng hindi bababa sa siyam na saksak sa iba’t ibang bahagi ng katawan ang biktima, na natagpuang nakahandusay at duguan sa gilid ng kalsada ng mga tanod na rumesponde. Agad siyang isinugod sa ospital kung saan patuloy siyang inoobserbahan.
Pitong menor de edad na sangkot sa insidente ang dinala sa Police Station 1 habang nagpapatuloy ang imbestigasyon ng mga pulis upang matukoy ang lawak ng pananagutan ng bawat isa. Inaalam pa rin kung sino sa mga kabataang ito ang may direktang kinalaman sa pananaksak.
ADVERTISEMENT
