Suspek sa kasong frustrated murder sa El Nido, nadakip na

Nahuli na ng pulisya ang suspek sa kasong frustrated murder at itinuturing na most wanted person sa Munisipyo ng El Nido.

Kinilala ang naarestong indibidwal na si Rosellier Delapiña Flores, 21 taong gulang, binata, magsasaka at residente ng Brgy. Barotuan, El Nido, Palawan.

Inaresto ang suspek ng mga tauhan ng El Nido Municipal Police Station (MPS) bandang 1:30 pm kahapon, June 28, sa Sitio Taberna, Brgy. Barotuan sa bisa ng ibinabang Warrant of Arrest ni Judge Emmanuel Q. Artazo ng Family Court ng Taytay, Branch 14FC, noong Marso 10 ngayong taon.

Umabot naman sa P200,000 ang inirekomendang piyansa ng korte para sa pansamantalang kalayaan ng suspek.

Sa kasalukuyan ay nasa kustodiya na ng El Nido MPS ang arestadong indibidwal.