Nagawa na umano ni Palawan 2nd District Representative Jose Chaves Alvarez ang lahat ng diplomatikong hakbang upang makalaya at mapauwi ang 24 na Palawenyong mangingisda, kabilang ang 2 bagong nadagdag na nakapiit sa Kota Kinabalu, Malaysia dahil sa umano’y ilegal na pangingisda sa teritoryo nito.
Sa isang press conference noong Pebrero 27, ibinahagi ni Alvarez na matapos ang pakikipag-ugnayan sa Chief of Police ng Kota Kinabalu, Department of Foreign Affairs (DFA), at sa mga opisyal ng Malaysia, kasalukuyan nang inaayos ang lahat ng kinakailangang legal na dokumento, kabilang ang travel documents ng mga mangingisdang Pilipino upang tuluyan silang makauwi sa Palawan.
“Mabuti naman ang kalagayan nila wala namang may sakit. Sa tingin ko makauwi to matagal na masyado ang two weeks dahil ginawa ko na ang lahat ng diplomatic approaches eh,” pahayag ni Alvarez.
Dagdag pa ng kongresista, na-release na rin umano ang kanilang mga bangka at kasalukuyang hinihila ang mga ito patungong isla ng Candaraman, sa Balabac.
“Yung mga bangka nila kasalukuyang hinihila na papuntang Balabac. Dadalhin doon sa Candaraman tinanggalan kasi ng mga makina eh. So, nag-hire ako ng isang bangka para i-haul papuntang Balabac.”
Ibinahagi rin ni Alvarez na wala umanong isinampang kaso ang mga awtoridad sa Kudat laban sa mga naturang mangingisda. Tiniyak din ng Kota Kinabalu Headquarters na nasa maayos silang kalagayan habang nasa kustodiya.
May nakausap na rin umano ang kongresista na kabigan nito na handang sagutin ang mga pamasahe sa eroplano ng 24 na mangingisda.
Sa ngayon, nakatakdang magtungo si Councilor Elgin Damasco sa Malaysia upang masiguro ang kalagayan at kapakanan ng mga mangingisda.
Matatandaan na noong Pebrero 6 ay dinakip ng mga kapulisan ang mga naturang indibidwal na pawang mga taga-Rizal, Palawan dahil sa ilegal na pagpasok at pangingisda sa teritoryo ng Malaysia. Wala rin naipakitang kaukulang dokumento ang mga ito kaugnay sa kanilang aktibidad.
