Lalaking nangingisda, inatake ng buwaya sa Balabac

Isang mangingisda ang inatake ng buwaya sa Sitio Silom-Silom, Barangay Catagupan, Balabac, Palawan Huwebes ng madaling araw, July 2.

Kinilala ang biktima na si Janilon Daking Amalong, 25 anyos at residente rin ng nasabing bayan.

Sa report mula sa Palawan PNP, sinasabing namamana ng isda para pang-ulam ang biktima kasama ang kanyang tiyuhin nang atakehin ito ng buwaya dahilan para magtamo ng mga sugat sa kanyang ulo at mukha.

Sa tulong ng kanilang mga kasamahan ay nai-ahon mula sa tubig ang biktima habang ang buwaya na tinatayang nasa tatlong dipa ang haba ay agad ring nakalayo.

Isinugod naman sa Rural Health Unit ng Balabac ang biktima at nakatakdang ilipat sa Ospital ng Palawan dito sa Puerto Princesa.