Negosyante sa Bayan ng Roxas, hinablot ang dalang bag habang sakay ng motorsiklo

Sakay man ng motorsiklo ay di pinatawad ng mga snatcher ang bag na dala ng isang negosyante sa Roxas, Palawan.

Kinilala ang biktima na si Cassandra Soldac, 54 anyos, biyuda, at residente ng Barangay 2, Roxas, Palawan habang ang mga suspek ay sina Reshly Mabasa, 23 taong gulang, unemployed, residente ng Brgy. Magara, Roxas, Palawan at isang hindi pa nakikilalang indibidwal.

Sa spot report ng Palawan PPO, nakasaad na naganap ang insidente dakong 12:45 am kahapon, Oktubre 2, 2020 sa Purok Centro, Brgy. New Barbacan habang naka-backride ang biktima sa isang motorsiklo, at pauwi na sa kanilang tahanan mula sa nasabing lugar. Sa puntong iyon ay sinundan umano ng mga suspek ang biktima at hinablot ang kanyang kulay itim na shoulder bag na naglalaman ng Oppo cellphone na kulay abo at itim, itim na pitaka na naglalaman ng P20,000 at Pearl Jewellery na tinatayang nagkakahalaga ng P5,000.

Sa kasalukuyan naman ay nagpapatuloy ang ginagawang imbestigasyon ng Roxas MPS para sa posibleng pagkakaaresto sa mga suspek.