Sugatan ang isang magsasaka matapos pagtatagain ng kanyang kasamahan sa inuman sa Barangay Burirao, Narra, Palawan noong Marso 8, 2025, bandang alas-10 ng gabi.
Kinilala ang biktima bilang si alyas Miko, 27 anyos, may kinakasama, at residente ng nasabing barangay. Samantala, ang suspek ay kinilala bilang si alyas Elton, 26 anyos, may kinakasama, at isa ring magsasaka mula sa parehong lugar.
Batay sa imbestigasyon ng mga awtoridad, nag-iinuman ang biktima, ang suspek, at dalawa pa nilang kasama nang bigla na lamang umano pagtatagain ng suspek ang biktima kahit walang malinaw na dahilan.
Nagtamo ng maraming sugat si Miko at agad siyang isinugod ng Narra Emergency Response Unit (NERU) sa Narra Municipal Hospital para sa agarang medikal na lunas.
Samantala, naaresto ng mga barangay tanod ang suspek, at narekober sa pinangyarihan ng insidente ang bolo na ginamit sa pananaga, na may sukat na 24 pulgada kasama ang hawakan.
Kasalukuyang inihahanda ng mga awtoridad ang kasong Frustrated Homicide laban sa suspek, alinsunod sa Artikulo 249 ng Revised Penal Code, para sa pormal na pagsasampa sa Tanggapan ng Panlalawigang Piskal ng Palawan.
Discussion about this post