Pormal nang iginawad sa Narra ang ika-apat nitong Seal of Good Local Governance (SGLG) award sa isang seremonyang inihanda sa pangunguna ng Department of Interior and Local Government (DILG) na ginanap sa Manila Hotel, Nobyembre 4.
Ang awarding ceremony ay dinaluhan ng mga konsehal ng Narra at ni Vice Mayor Crispin O. Lumba. Dumalo din si former Narra mayor Lucena Demaala.
Maitatalang ang SGLG award na ito ay ikaapat nang parangal na natanggap ng Narra mula sa DILG kaakibat sa pamumumo at termino ng nagdaang alkaldeng si Demaala.
Sa panayam ng Palawan Daily News kay Demaala kanina, nilinaw nito na siya ay dumalo mula sa imbitasyon ng mga miyembro ng Sangguniang Bayan (SB) ng Narra.
“Yes, I was invited by the legislative council,” ani ni Demaala.
Nilinaw din ni Demaala na si Vice Mayor Crispin Lumba kasama si SB Member Janet Nabua ang pormal na tumanggap ng award sa ginawang seremonya kanina.
“Nag-attend lang kami dito. Basta ang tumanggap ng award ay si Vice Mayor at si Kagawad Janet,” ani ni Demaala.
Ang Narra ay ang nag-iisang munispyo sa buong Palawan na nakatanggap ngayong taon ng prestihiyosong parangal mula sa DILG ngayong taon.
Matatandaang noong taong 2016 ay nakatanggap rin ng SGLG award ang Brooke’s Point kasabay ng Narra at noong taong 2017 ay nakatanggap rin ang munisipyo ng Sofroñio Española ng naturang parangal.
Ito na ang naitalang ikaapat na SGLG ng bayan ng Narra, isang patunay na ang local government unit (LGU) ay nakapasa sa ikaapat na beses, sa ginawang deliberasyon ng DILG sa pitong “core areas,” kaloob ang Financial Administration, Disaster Preparedness, Social Protection, Peace and Order, Tourism, Culture and Arts, Business Friendliness, at Environmental Management.
Maliban sa parangal, makaka-tanggap din ng tinatayang P2.3-milyon ang munisipyo ng Narra upang magamit sa mga ilalahad at kasalukuyang proyekto ng pamahalaan.
Ayon kay former mayor Demaala, noong nakaraang taon, nakatanggap ng P3.2-milyon ang LGU ng Narra mula sa DILG na kanilang ginamit sa mga proyektong pang-agrikultura kasama na ang pagpapatayo ng mga bilaran ng palay sa bawat barangay.
“Ang nilagay nating mga project noon ay bilaran ng mga palay sa bawat barangay kasi kulang ‘yung mga bilaran noon. Bawat barangay naman sa Narra ay may covered court kasi ‘yung mga binibilaran ng tao eh ‘yung mga plaza, kaya ang ginawa namin noon ay para sa mga purok at farmers association, nilalagyan natin,” ani Demaala.
“Kasi tayo ang rice granary of Palawan kaya doon ang focus ko,” dagdag ni Demaala.
Samantala, mayroon namang iilang residente ng Narra na nakapansin sa hindi pagdalo ni Narra Mayor Gerandy Danao sa awarding ceremony kanina.
“Nagtataka kami wala si Mayor Danao sa post ng Sangguniang Bayan kanina, may issue ba?” tanong ni alyas “Rey” na hiniling na itago ang kanyang pagkaka-kilanlan.
Tinungo ng Palawan Daily News ang opisina ni incumbent Narra Mayor upang kunan ng pahayag ang nasabing opsiyal na agad namang sumagot sa tanong ng kababayan.
“Hayaan mo sila. Hindi ako interesado,” giit ni Danao.
