Hindi lamang buhay ang nawala bunsod ng kamakailang pananalasa ng bagyong “Quinta” sa lalawigan kundi pati rin ang ilang produktong pang-agrikultura tulad ng mga pananim na seaweeds sa Purok Green Island, Brgy. Tumarbong, Roxas, Palawan.
Sa post ng Green Island, Roxas, Palawan Facebook page kahapon, ipinakita ang mga na-wash out na seaweeds na napag-alamang kasama sa mga pananim ni dating Barangay Kagawad Lino Sornito.
Ayon sa anak ni Sornito na si Louie Sornito, tinatayang dalawang tonelada ng sariwang tanim na seaweeds ang na-washout sa nagdaang malakas na hangin at alon.
“Gano’n talaga ang buhay—‘di talaga maiwasan ang kalamidad and kasama talaga sa risk as farmer [ang ganitong kaganapan],” ang nasambit naman ni Sornito.
Sa natanggap namang impormasyon ng Palawan Daily News (PDN), ang bilihan ng seaweeds sa nasabing isla bago ang COVID-19 pandemic ay nasa ₱60 pataas ngunit ngayong panahon na ng pandemya ay nasa ₱38 na lamang ito hanggang ₱40, habang kapag sariwa naman ay ₱5 lamang.
