Bilang ng sasakyang pandagat ng tsina sa West Philippine Sea, umabot na sa 203

Sa ulat ng Philippine Navy, mula Agosto 27 hanggang Setyembre 2, umabot sa 203 ang kabuuang bilang ng mga barko ng China sa rehiyon, mas mataas kumpara sa 163 na naitala noong nakaraang linggo.

Batay din sa datos ng Philippine Navy, ang pinakamalaking konsentrasyon ng mga sasakyang pandagat ng China ay nasa Sabina Shoal at Pagasa Island, kung saan nakapagtala ng 71 at 52 barko, ayon sa pagkakasunod.

Kabilang sa mga ito ay 53 barko ng Chinese Maritime Militia, 9 mula sa Chinese Coast Guard, at 9 na barko ng People’s Liberation Army Navy.

Nananatili namang nakaposisyon ang BRP Teresa Magbanua ng Philippine Coast Guard sa Sabina Shoal, sa kabila ng insidente kung saan ito ay nabangga ng isang barko ng China kamakailan. Ayon sa mga eksperto, posibleng ito ay bahagi ng estratehiya ng China upang buwagin ang presensya ng Pilipinas sa naturang lugar.

Samantala, sa Ayungin Shoal naman, kung saan nakatalaga ang mga tropa ng Pilipinas sakay ng BRP Sierra Madre, tumaas din ang bilang ng mga barko ng Chinese Coast Guard mula 22 noong nakaraang linggo patungong 26 ngayong linggo.

Namonitor din ang mga barko ng China sa iba pang lugar tulad ng Scarborough Shoal, Iroquois Reef, Rizal Reef, at Kota Island, na patuloy na nagpapataas ng tensyon sa rehiyon.