Patay ang isang 56-anyos na lalaki matapos umanong bugbugin ng kainuman nitong babae noong 10AM ng Martes, Nobyembre 25 sa Sitio Tugbuan, Barangay Caguisan, Narra, Palawan.
Mula sa spot report galing sa otoridad, nakilala ang biktima bilang si Rodrigo Lucena, mangagawa, at residente ng Barangay Sandoval, Narra, Palawan habang ang suspek naman ay nakilalang si Rosalinda Barrera, nasa legal na edad, isang labandera at residente ng Langka St. Barangay Poblacion, Narra, Palawan.
Ayon sa imbestigasyon ng mga pulis, nakatanggap ng tawag mula sa isang concerned citizen ang Narra Municipal Police Station (NMPS) ganap na 1PM ng hapon ng Miyerkules hinggil sa krimen.
Nang kanila itong respondihan, natuklasan ng mga otoridad na noong Martes ay nag-inuman ang suspek at biktima sa isang vulcanizing shop sa pagmamay-ari ng suspek sa Barangay Antipuluan, Narra, Palawan.
Matapos uminom ng ilang bote ng alak mula sa lugar, nagdesisyon ang suspek at biktima na lumipat sa Sitio Tugbuan, Barangay Malinao sa parehong bayan at dito itinuloy ang kanilang inuman.
Ngunit sa gitna ng kanilang inuman, isang argumento ang sumiklab mula sa pagitan ng dalawa na nagdulot ng agarang pisikalan kung saan naitulak umano ng suspek ang biktima dahilan ng pagkatumba nito. Ayon pa din sa mga pulis, patuloy na inatake ng babaeng suspek ang biktima. Dito patuloy niyang pinagsisipa sa iba’t-ibang bahagi ng katawan at biktima at iniuntog ang ulo nito sa semento.
Nagtamo ng ilang sugat, pilay at pinsala sa iba’t-ibang bahagi ng katawan ang biktima na agad isinugod ng mga kawani ng Narra Emergency Rescue Unit (NERU) sa Narra Hospital. Ngunit sa tindi ng natamong pinsala, isinugod ito sa Ospital ng Palawan ngunit binawian din ng buhay.
Sa mga oras na ito, ang suspek ay hawak na ng mga otoridad at maaring makasuhan ng paglabag sa Republic Act 7659 at maari ding maharap sa kasong Homicide.
Discussion about this post