Nahuli na naman ang dalawang dating nasangkot umano sa ilegal na droga sa ikinasang buy-bust operation ng Police Station 5 sa Barangay Lucbuan nitong gabi ng Martes, Mayo 27.
Kinilala ang mga suspek sa alyas na Jaime, residente ng Barangay Maryugon, at alyas na Jayson mula Barangay Sicsican. Ayon sa mga operatiba, nakumpiska mula sa kanila ang isang pakete ng pinaghihinalaang shabu matapos silang bentahan ng P1,000 halaga nito sa isang poseur buyer.
Bukod sa marked item na nabilhan sa aktwal na transaksyon, tatlo pang sachet ng hinihinalang shabu ang narekober sa isinagawang body search. Inaalam pa ng pulisya kung saan nanggaling ang mga karagdagang kontrabando at kung may koneksyon ito sa mas malawak na drug network sa lungsod.
Ayon sa inisyal na ulat, may naitala nang kasaysayan ang dalawa sa ilegal na droga, na nagpapatingkad sa tanong kung gaano kaepektibo ang rehabilitasyon o pagbabantay sa mga dating naitalang drug personalities sa Puerto Princesa.
Patuloy ang imbestigasyon habang inihahanda na ang kasong isasampa laban sa dalawang suspek na pansamantalang nakapiit sa custodial facility ng istasyon.
