𝘚𝘢 𝘪𝘴𝘢𝘯𝘨 𝘮𝘢𝘥𝘶𝘨𝘰𝘯𝘨 𝘉𝘪𝘺𝘦𝘳𝘯𝘦𝘴 𝘚𝘢𝘯𝘵𝘰 𝘴𝘢 𝘉𝘢𝘳𝘢𝘯𝘨𝘢𝘺 𝘐𝘳𝘢𝘸𝘢𝘯, 𝘵𝘢𝘵𝘭𝘰𝘯𝘨 𝘣𝘶𝘩𝘢𝘺 𝘢𝘯𝘨 𝘣𝘪𝘨𝘭𝘢𝘯𝘨 𝘯𝘢𝘱𝘶𝘵𝘰𝘭 𝘥𝘢𝘩𝘪𝘭 𝘴𝘢 𝘪𝘴𝘢𝘯𝘨 𝘢𝘭𝘢𝘯𝘨𝘢𝘯𝘪𝘯𝘨 𝘱𝘢𝘨𝘵𝘶𝘵𝘶𝘳𝘰 𝘯𝘢 𝘩𝘪𝘯𝘥𝘪 𝘮𝘢𝘯 𝘭𝘢𝘯𝘨 𝘥𝘶𝘮𝘢𝘢𝘯 𝘴𝘢 𝘮𝘢𝘴𝘶𝘴𝘪𝘯𝘨 𝘣𝘦𝘳𝘪𝘱𝘪𝘬𝘢𝘴𝘺𝘰𝘯.
Isang malaking katanungan ngayon ang lumutang sa gitna ng imbestigasyon sa madugong pamamaril sa Barangay Irawan matapos aminin ni Police Regional Office (PRO) Mimaropa chief Brig. Gen. Jovencio Badua Jr. na hindi tiyak ang pagkakakilanlan sa isa sa mga nasawi na si CO1 Jerson Talon bago naganap ang engkwentro.
Sa isang panayam sa Radyo Pilipinas Palawan noong Abril 6, inihayag ni Badua na ang pagkakadawit ni Talon sa insidente ay nagmula lamang sa mabilisang pagtuturo ni PCpl Renato Bendaña, isa sa mga pulis na unang nakasagupa ng mga tao sa isang lamayan sa Zone 13 noong Biyernes Santo.
Ayon kay Badua, nang tanungin niya si Bendaña kung sigurado itong si Talon ang isa sa mga nambugbog sa kanila, ang naging sagot ng pulis ay: “Sir, kahawig.”
“Susmaryosep, kako, kahawig lang pala eh. Hindi pala kayo sure… sana iba yong approach niyo doon. Sana kinausap na lang yong family, kinausap ng maayos,” pahayag ni Badua sa panayam, kung saan hayagan niyang pinuna ang naging aksyon ng kanyang mga tauhan.
Binigyang-diin din ng hepe na wala sa anumang drugs list si Talon, taliwas sa mga espekulasyong kumakalat sa publiko. Aniya, lumalabas sa paunang pagsusuri na posibleng kaso ito ng mistaken identity na nauwi sa trahedya dahil sa kawalan ng pagtitimpi at propesyonalismo.
Batay sa sequence ng insidente, rumesponde sina PSSg Ryan Cris Cabaña at PSSg Jayson Fernandez matapos kuyugin sina Bendaña at PSSg Jonah Balangan sa isang alitan sa lamayan ni Mr. Rivera. Dahil sa pagtuturo na “kahawig” ni Talon ang suspek, nagtungo ang mga pulis, na pawang naka-sibilyan at ang ilan ay umano’y nakainom, sa tahanan nito na humantong sa palitan ng putok.
Tatlo ang kumpirmadong nasawi sa insidente: sina Cabaña, Fernandez, at ang biktima ng hinihinalang maling pagtuturo na si Talon.
Sa gitna ng mga lapses sa protocol na kinabibilangan ng hindi pagsuot ng uniporme at hindi paggamit ng marked police vehicle habang nasa full alert status, tiniyak ni Badua na magpapatuloy ang malalimang imbestigasyon.
Kasalukuyan nang nagsasagawa ng joint probe ang Philippine National Police (PNP) at National Bureau of Investigation (NBI) upang matukoy ang administratibo at kriminal na pananagutan ng mga nasabing opisyal.
