Sinaksak ang isang negosyante matapos atakihin ng kanyang kapwa negosyante sa Purok 4, Barangay Caguisan, Narra, Palawan noong Abril 25, 2025, bandang 9:30 ng gabi.
Kinilala ang biktima sa alyas na “Melany,” 39 anyos, residente ng Brgy. Caguisan. Samantalang ang suspek ay nakilalang si alyas “Bambam,” 39 anyos, din, at residente rin ng parehong barangay.
Batay sa inisyal na imbestigasyon, bago naganap ang insidente, nag-inom ng isang bote ng beer ang suspek. Kalaunan, pinuntahan nito ang biktima sa loob ng silid habang natutulog, at sapilitang kinuha ang cellphone nito.
Agad namang lumabas ng bahay ang biktima at sumakay sa kanyang sasakyan. Habang pinapaandar ang makina, bigla siyang inatake ng suspek, sinaksak ng dalawang beses sa likod gamit ang kutsilyo. Nagawang bumaba ng biktima at tumakbo, ngunit hinabol siya ng suspek at patuloy na sinaktan. Nang matumba, sinakal pa siya ng suspek gamit ang hawak nitong kutsilyo.
Matapang na lumaban ang biktima at muling nakatakas, humingi ng tulong sa isang kalapit na kapitbahay. Agad siyang dinala sa barangay hall ng Princess Urduja at inihatid ng mga tauhan ng Narra Emergency Response Unit (NERU) sa Narra Municipal Hospital para sa agarang gamutan.
Nagsagawa ng manhunt operation ang mga awtoridad, subalit hindi na naabutan ang suspek sa kanyang tirahan. Hindi rin narekober ang ginamit na armas. Ayon sa mga imbestigador, selos ang nakikitang motibo sa pananakit.
Patuloy ang isinasagawang imbestigasyon ng pulisya upang madakip ang suspek.
