Last Updated on
Nasa tinatayang 600 anti-coal advocates ang nagsagawa ng general information and education campaign sa RVM Gymnasium na sinabayan naman ng “silent rally” ng nasa tinatayang lalagpas 200 na pro-coal advocates nitong Sabado, Oktobre 12.
Sa panayam ng Palawan Daily News kay Kagawad Farman ng Barangay Bato-Bato inilahad nito na ang kanilang mga kasamahan na karamihan ay residente din ng naturang barangay ay kusang-loob na sumama sa isinagawang pagsuporta.
Dagdag pa ni Farman, ang mga ito raw ay naniniwala na ang pagsulong ng Coal-Fired Power Plant sa bayan ng Narra ay makakatulong sa matagal ng paulit-ulit na brownout na nangyayari sa iba’t-ibang bahagi ng lalawigan ng Palawan.
“Mas marami kami ngayon kasi siguro mas marami ng tao ang nakaunawa. Na-analyze na nila ang sitwasyon,” anya ni Farman.
Samantala, sa panayam naman ng Palawan Daily News kay Kapitan Ernesto Ferrer ng Barangay Bato-Bato, ipinaalam nito na nagsagawa sila ng pangalawang silent rally upang maipaunawa sa publiko na ang pagkakaroon ng Coal-Fired Power Plant sa kanilang barangay ay hindi nangangaluhugang pagkasira ng kalikasan. Bagkus, ito raw ay daan tungo sa progresong inaasam ng bawat Palawenyo.
“Silent rally lang upang mapakita lang namin ang aming layunin,” anya ni Ferrer.
Ayon din kay Ferrer, kanila na umanong binigyan ng “business permit” ang DMCI Power Corporation kamakailan, upang magamit ng naturang kumpanya sa pagproseso ng kanilang mayor’s permit gayundin ang kinakailangang business permit at iba pang clearance at mahalagang dokumento.
“Meron na kaming binigay na business permit sakanila para magamit nila sa pagkuha nila ng mayors permit at building permit sa engineering office,” ani ni Ferrer.
Samantala, kasabay ng silent rally ng mga pro-coal protesters sa Narra Parkway, ikinasa din ng mga anti-coal advocates ang kanilang nakatakdang “General Public Hearing” o information and education campaign sa nasabing bayan kung saan ito ay dinaluhan ng humigit-kumulang 600 kataong hayagang tumututol sa pagpapatayo ng nasabing planta sa kanilang munisipyo.
Kabilang sa mga dumalo ay mga miyembro ng kilalang No To Coal Movement, mga estudyante mula sa Narra National High School, mga guro ng San Francisco Javier College (SFJC), mga volunteers, representative ng simbahan, at ilang faculty member at staff ng Western Philippine University (WPU) gayundin ang maraming pribadong indibidwal.
Ayon kay Joel Pelayo, tumatayong spokesperson ng No To Coal Movement, kanila umanong inasahan na magsasagawa din ng “silent rally” ang mga pro-coal advocates kasabay ng kanilang nakatakdang pagpupulong ngayong araw.
“Actually inasahan na namin ang gagawin nila. Kasi ‘yan naman talaga ang technique nila. Gumawa ng distraction para malihis ‘yung issue,” ani ni Pelayo.
Dagdag ni Pelayo, kanila din umanong inimbitahan ang mga opisyal ng Sangguniang Bayan sa pamamagitan ng pormal na liham, subalit, sa kasamaang-palad, sa 12 miyembro ng legislative council, tanging si Kagawad Amalia Gimpaya lamang ang dumalo sa nasabing pagpupulong.
“Lahat naman sila pormal nating inimbitahan na dumalo pero sadly si Kagawad Gimpaya lang ang nandito. Sa part namin, okay lang yun. Nasa sa kanila naman ‘yan, basta kami ginawa namin ang parte namin,” anya ni Pelayo.
Ilang rebelasyon din ang kinuwento ng mga taong nagmula sa anti-coal movement na boluntaryo umanong nagsalita ayon kay Pelayo.
Kabilang sa mga nagsalita ay si Annalyn Rami, isang inang nanindigan upang tutulan ang Coal-Fired Power Plant sa Narra. Lahad ni Rami, sila umano ay tumira ng limang taon sa Rio Tuba, kung saan may nakatayong isang pribadong Coal-Fired Plant na pag-aari ng Coral Bay Nickel Corp. (CBNC) at Rio Tuba Nickel Mining Corp. (RTNMC).
Pagpapatuloy ni Rami, nagkaroon ng lung cancer ang isa sa kanyang mga anak dala umano ng usok na ibinubuga ng planta sa kanilang barangay.
“Na-diagnose ang anak ko ng lung cancer. Noong kinausap ko ang doktor, sabi niya sa hangin na nalalanghap ng anak ko ang dahilan. Ang hirap sakin bilang ina na makita ‘yung anak ko na ganoon ang kalagayan,” ani ni Rami.
May mensahe rin si Rami sa mga opisyales na nag-endorso nito.
“Masakit para saamin na ‘yung ibinoto ko ay ‘yun din pala ang sisira sa pinangangalagaan natin. Isa lang masasabi ko, mga muka kayong pera,” dagdag ni Rami.
Bago tuluyang matapos ang pagpupulong, dumating naman si Narra Mayor Gerandy Danao na ikinatuwa ng mga dumalo.
Bago tuluyang matapos ang pagpupulong, dumating naman si Narra Mayor Gerandy Danao na ikinatuwa ng mga dumalo.
“Isa akong magsasaka. Nagtapos ako ng agriculture. Basta kung saan ang boses ng bayan, doon tayo,” anya ni Danao.
Discussion about this post