Hindi na basta-basta ang magiging selebrasyon ng taunang Baragatan Festival ngayong Hunyo dahil sa unang pagkakataon, pormal nang nakipag-alyansa ang kapitolyo sa mga miyembro ng pribadong sector ng lalawigan upang masiguro na ang darating na Baragatan Festival 2026 ay hindi lamang magiging isang lokal na pagtitipon, kundi isang world-class na selebrasyon.
Ito ay sa pamamagitan ng isang Memorandum of Understanding (MOU) na nilagdaan ni Palawan Governor Amy Alvarez at ng Palawan Tourism Council (PTC) sa pangunguna ni Presidente Rix Rafols, bilang katuwang sa pagpapatakbo ng festival.
Ayon sa Gobernadora, layunin niyang “i-maximize” ang pondong nagkakahalaga ng P50 milyon para sa selebrasyon. Sa mga nakaraang taon, napuna niya na tila hindi nagtutugma ang inilalaang budget sa kinalalabasan ng pista.
“I want this Baragatan to be maximized. Lahat ng pondo ay i-maximize natin sa lahat ng ganap dito sa Palawan. Through PTC’s help, we can do it. I am also not a one-woman show; I need all the help that I can get,” pahayag ni Alvarez.
Sa ilalim ng kasunduan, ang PTC ang mamamahala sa pakikipag-ugnayan sa mga stakeholders, koordinasyon sa komunikasyon, at ang mahalagang gawain ng paglikom ng mga sponsors o sponsorship mobilization. Sila rin ang nasa likod ng mas pinaigting na program scheduling upang masiguro na ang mga taga-munisipyo ay mahikayat na bumisita sa Puerto Princesa City.
Ayon naman kay Rix Rafols, ang sining, kultura, at pamana ang magiging pundasyon ng kanilang plano. Naniniwala ang PTC na ang kultura ang nagsisilbing ugat na nagpapatatag sa atin, habang ang sining naman ang nagbibigay ng “pakpak” upang ang lalawigan ay makalipad at makilala sa malayo. Layunin ng kanilang grupo na ipakita ang natatanging ganda ng bawat munisipyo sa Palawan sa loob ng isang entablado, habang sinisiguro ang operational readiness ng bawat aktibidad.
Bagama’t aminado si Governor Alvarez na hindi pa agad magiging kasing-laki ng Sinulog ang Baragatan sa taong ito, naniniwala siyang kailangang magsimula sa isang matibay na pundasyon.
Ang pakikipagtulungan sa mga eksperto mula sa pribadong sektor ay ang unang hakbang upang ang taunang pagdiriwang ng pagkakatatag ng Civil Government ay maging isang engrandeng pagtitipon na hindi lamang ipinagmamalaki ng mga lokal, kundi dinarayo rin ng mga turista mula sa iba’t ibang panig ng bansa.
