Hindi bababa sa limang Antigen positive patients o COVID probable ang naunang pinauwi na sa kanilang mga tahanan kamakailan upang magkaroon ng bakante ang mga quarantine facility ng Lungsod ng Puerto Princesa.
“Mayroon kaming pinauwi na antigen positives na asymptomatic. Kasi punong-puno na eh! [ang mga pasilidad natin]. Wala kang malalagyan [ng mga bagong dating na pasyente],” ayon kay City Incident Management Team (IMT) Commander Dr. Dean Palanca sa phone interview na aniya, sinimulan nila ito noong Sabado.
Matatandaang sa naganap na pulong-balitaan na ipinatawag ni Mayor Lucilo Bayron noong Sabado kaugnay sa pagiging GCQ status ng siyudad ay nauna nang inanunsiyo ng opisyal na posibleng magpauwi sila ng antigen probable na walang sintomas o mayroon lamang mild symptoms ng araw ding iyon o Lunes.
Aniya, ito ang Plan B ng siyudad bunsod ng punuan na sa mga quarantine facilities simula pa noong nakaraang linggo. Sa kasalukuyan umano, kahit na may pinauuwi na ring mga COVID-19 positive na namalagi na ng 10 araw sa pasilidad at sa tatlong araw ay wala nang sintomas ay hindi pa rin ito nakaluwag sa mga pasilidad.
“Dahil nga itong mga lugar [natin] ay napupunaan talaga tayo hanggang dito sa ino-open [lang] natin na AA [Plaza] ay halos puno na rin araw-araw kasi may mga bagong patients na dumarating,” pahayag pa ni Dr. Palanca.
Karamihan naman umano sa nasabing mga antigen suspect ay mula sa urban barangay ng Lungsod ng Puerto Princesa.
“Pero kung sakaling magiging symptomatic ‘yan, kukunin namin [sila uli] at ibabalik namin sa quarantine facility,” paglilinaw naman ni Dr. Palanca.
Regular naman umano silang imo-monitor ng nurse ng IMT, katuwang ang BHERTS ng concerned barangay.
Ngunit nilinaw ni Dr. Palanca na kapag walang sariling kuwarto at palikuran ang uuwiang tahanan ng isang pasyente ay hindi naman siya pauuwiin at mamamalagi siya sa pasilidad ng siyudad hanggang sa makumpirmang wala siyang COVID-19.
Aniya, sa kabila ng mga hakbang para mabakante ang mga quarantine facilities, mas marami pa rin ang nadadagdag kaya punuan pa rin ang mga pasilidad. Kaya ang ginawa umano nila, kahit na hindi magkakapamilya, sa ngayon ay pinagsasama na ang mga positibo sa antigen tests
Aniya, nasa “tipping point” na ang Lungsod ng Puerto Princesa sa ngayon kaya kinakailangan nang gawin ang nasabing hakbang na ginagawa na rin umano sa Maynila bunsod ng pag-akyat ng kaso ng COVID-19.
Sa ngayon, nagdagdag ng tao ang IMT ngunit kulang pa rin sila sapagkat marami umano ang umaatras kapag nalaman ang polisiya na hindi sila pwedeng basta na lamang uuwi sa pamilya upang hindi sila mahawaan at baka madala pa sa pasilidad ang virus.
Sa kabialng dako, ang Magarwak naman ay pinapuntahan na rin ng Alkalde dahil kailangan nang muling buksan para gamitin sa antigen test positives. Huling ginamit ang pasilidad mahigit isang linggo na ang nakararaaan at nakaalis na rin ang mga inilagak doong PDL.
Nakalulungkot man umano ngunit kailangan na lamang na mapagtagumpayan ngayon ang problema na sa pagsasalarawan ng mga kinauukulan ay “kritikal na” kaya kailangang gawin na lamang ang “pinaka the best na solusyon.”
Discussion about this post