Sa gitna ng mga kontrobersyang kinasasangkutan ng pulisya sa lalawigan, isang malagim na kwento ng pagmamalabis sa kapangyarihan ang nailahad sa Palawan Daily News pitong buwan matapos ang isang krimen na kumitil sa buhay ng isang 46-anyos na lalaki sa bayan ng Culion.
Nabasag ang mahabang katahimikan ng kaso nitong Biyernes, Abril 10, matapos madakip ng mga awtoridad sa Culion ang suspek na si BJ Montaño, ang nagsilbi umanong “asset” ng pulis na itinuturong pumatay kay Ferdinand Abadiano noong nakaraang taon.
Ngunit sa kabila ng paglabas ng warrant of arrest, nananatiling umanong malaya at kasalukuyan pang aktibong gumaganap sa kanyang tungkulin ang pangunahing suspek na si PSSg Arden Cortez, na naka-assign ngayon sa Agutaya Municipal Police Station (MPS).
Batay sa impormasyong nakalap mula sa source na itinago sa pangalang “Robert” para sa kanyang seguridad, naganap ang pamamaslang bandang 8:30PM noong gabi ng Setyembre 6, 2025, sa Barangay Balala, Culion, Palawan.
Lasing umano si Cortez, nakasibilyan pero suot ang kanyang police jacket nang pasukin ang tahanan ng biktima kasama ang lasing din na si Montaño.
Sa kabila ng pagiging mag-“brother” nina Cortez at Abadiano sa fraternity na Tau Gamma Phi, tinutukan umano ng baril ng pulis ang biktima bago nila ito pinagtulungang gulpihin sa loob mismo ng pamamahay nito.
Ayon pa kay Robert, tumagal ang tensyon ng mahigit isa’t kalahating oras kung saan hinala sa ilegal na droga ang itinuturong mitsa ng dahas.
Madaling araw ng Setyembre 7 nang tuluyang malagutan ng hininga si Abadiano matapos dumaing ng matinding sakit sa katawan. Ayon sa death autopsy result mula sa pagsusuri ng NBI, Traumatic Injury sa abdomen ang naging mitsa ng kanyang kamatayan, isang indikasyon ng tindi ng bugbog na tinamo nito sa kamay ng mga suspek.
Kinumpirma rin ni Cedric Caabay, imbestigador ng National Bureau of Investigation (NBI) Palawan, na pormal na silang nagsampa ng kasong homicide laban sa mga suspek na naging basehan sa pagpapalabas ng warrant of arrest.
Ngunit sa halip na ma-relieve o masuspende sa tungkulin habang gumugulong ang imbestigasyon, napaulat na inilipat lamang umano ng Philippine National Police (PNP) si Cortez sa El Nido sa loob ng isang buwan. Matapos ang maikling pananatili sa El Nido, binigyan ito ng bagong assignment at kasalukuyang naninilbihan sa Agutaya MPS.
Sa loob ng pitong buwan, nagawang ilihim ng pamilya Abadiano ang detalye ng krimen dahil sa matinding takot, lalo na’t isang aktibong miyembro ng PNP ang kanilang idinidiin na malaya pang nakakalipat ng destino sa kabila ng kinasasangkutang krimen.
Ang paglabas ng warrant of arrest nitong Abril 10 ang naging hudyat upang maunang madakip si Montaño sa Culion.
Nahaharap ang dalawang suspek sa kasong homicide na ngayon ay gumugulong na sa Regional Trial Court (RTC) sa Coron, at karagdagang administrative case ng pulis na si Cortez sa ilalim ng Palawan Provincial Police Office (PPO).
Sinubukan ng Palawan Daily News na makuha ang panig ni PSSg Cortez, ng Agutaya MPS, at ng Palawan Provincial Police Office (PPO), ngunit bigo ang pahayagan na makakuha ng anumang pahayag mula sa kanila hanggang sa oras ng pagkakalathala ng ulat na ito.
Bukas pa rin ang Palawan Daily News sa panig ng mga akusado.
Inaasahang ang pagkakaaresto kay Montaño ang magsisilbing susi upang tuluyang mapanagot si Cortez at mabigyan ng katarungang matagal nang hinihintay ng pamilya Abadiano.
