Hepe ng PNP Narra, binatikos ni mayor Danao dahil sa hindi pagdalo sa LGU flag ceremony

Sa kanyang talumpati, inihayag ni Mayor Danao ang kanyang pagkadismaya sa pagliban ni Timbancaya sa seremonya ng lokal na pamahalaan tuwing Lunes, na dinadaluhan ng mga kawani ng LGU at iba pang ahensya ng gobyerno sa munisipalidad.

Dagdag niya, makakatanggap umano ng memo ang naturang hepe dahil sa dalawang linggo na umano itong lumiliban sa nasabing seremonya.

Mariin ding sinabi ng alkalde na hindi niya gusto ang kasalukuyang hepe ng pulisya sa Narra, at ikinumpara pa ito sa dating chief of police na si PLt. Carl Marx Cawili.

“Sa totoo lang, ayaw ko ‘yan dito si Starzky. Ayaw ko ‘yan dito sa Narra. Hindi ko gusto ‘yan,” ani Danao.

Samantala, sa isang Facebook post naman, ipinaliwanag ni Major Timbancaya na siya ay kasalukuyang nasa Training and Educational Program for Law Enforcement Officers (TEPLEO) seminar sa Asturias Hotel, Puerto Princesa City, kaya hindi siya nakadalo sa nasabing seremonya.

Dagdag pa niya, “I need to explain, like what Attorney Gadon’s saying… I never requested it, I never ask for it. Basic procedural tayo. Relax. Do what you can, and I will follow, no worries,” ani Timbancaya.

Samantala, patuloy rin nitong nilinaw na maglilingkod siya sa bayan ng Narra sa abot ng kanyang makakaya.

Kilalang matinik pagdating sa pagpapatupad ng batas at panghuhuli ng mga pasaway sa bayan ang hepe na nagsilbi na ring COP sa ibang mga munisipyo sa Palawan kabilang na ang Coron, El Nido at Rizal.